5 مشترك

رحلة في صحراء بيوضة

ود الملاوي: المشرف العام; عدد المساهمات : 357
تاريخ التسجيل : 09/05/2009
الموقع : الدمام - السعودية

مساهمة رقم 1

رحلة في صحراء بيوضة

ود الملاوي الإثنين مايو 11, 2009 2:53 am

رحلة في صحراء بيوضة
وصحراء بيوضة لمن لا يعرفها غرب منطقة الرباطاب وجنوب المناصير وشرق الحسانية
الرحلة بدات من منطقة كرقس بالرباطاب الى منطقة امات حطيب مسيرة تلات ايام بالابل ،،، تم ذكر كل الجبال والمناطق المعروفة بالمنطقة اتمنى تعجبكم

ياخلا العلي لازماهو والله الشورة
طال بي الطريق والحلة ما مخبورة
*****
ابسلم الفوق يالعمدة ود محجوب
امرق التلتين ان كان مرق حبوب
منها المسير والنية بالدعيوب
مابفيد المنى دايما يجي المكتوب
*****
في التلعة المبيت معاهم الاحباب
وللبيت والمراح ديمة القدم قراب
معا دبورة العتمور ذهاب واياب
بالبنز الاصيل المتقرالو كتاب
*****
من التلعة واخدنا جيهة ابسول
ولي ديك الديار شوقا يسوق الزول
اللسد الهميم بيسرعة قام معجول
ولامات حطيب اصبح عديل مسئول
*****
الرزام هناك شفناهو طاقي عديل
وبي جاي السميح المتوجدلو مثيل
من دغس العيون حصادنا كان بهديل
ورجعنا للنعلات فرغنا فيها الكيل
*****
بي ود حبوش جينا ونهارنا صباح
وبين وكر ودموع اتفتقتلي جراح
شاحد الله الكريم يجمعبو زولى الراح
معدوم المثيل تب لاعجم لافصاح
*****
من أمات حطيب رجعنا ديك جورا
وغلبني الوصف ماني سيد خبرا
داك البكان الشفتو اصلو برا
وياريت كان تشوف الغيبة من عصرا
*****
جبال النحلة يامصورة دوام في البال
والعتمور خلاص في راسي صار موال
علي خالقا لو فيها باقي ارسال
بشد الخطوة وامشيهن سهول وجبال
*****
من ملاوي بهديكم سلام بالجمله
في أم ضحيان هناك صبحت رئاسة الحمله
بدرا في السما حاتكون اكيد مكتمله
شاحدك بالخلق اطراها قول بسم الله
--------------------------------
إيهاب الملاوي 1996 م

ود الملاوي

ود الملاوي: المشرف العام; عدد المساهمات : 357
تاريخ التسجيل : 09/05/2009
الموقع : الدمام - السعودية

مساهمة رقم 2

رد: رحلة في صحراء بيوضة

ود الملاوي الإثنين يونيو 01, 2009 12:21 am

ياجماعة القصيدة ما عجبتكم ما شوية كدا كشكروا وجاملوا انشاء الله

ابوسعود

ابوسعود: مشرف المنتدى العام; عدد المساهمات : 87
تاريخ التسجيل : 19/05/2009
العمر : 64

مساهمة رقم 3

رحلة استكشافية

ابوسعود الإثنين يونيو 01, 2009 1:50 am

والله يا ود الملاوى القصيدة من ناحية نظم ووصف للرحلة ما فيها كلام تب حاجة ممتعة جداً جداً .. لكين كمان الفضول ما خلانا .. اولاً انت الوداك من كرقس لى امات حطيب شنو ؟ دا المحيرنى .. واللا انت تكون رحالة ونحن ما عارفين ؟ شى يحير.... تلا آ آ آ تة يــوم ماشى بدون شورة وكمان فى طريق مامخبورة ..

القصيدة جميلة تذكرنى قصايد الهمباته .. بس دى سلمية جداً ( وطبعا الهمباته كانوا زى روبن هود ياخدو من الغنايانيين الماشين بالدرب ويدو عربان الفرقان الرحل الفقرا ..)
دايرنك توضح لينا عن الفرقان الفى الخلا دى .. التلعة ابسول لامات حطيب الرزام السميح ود حبوش ... الناس الفيها منو هم ؟ هل هم عرب حسانية واللا كواهلة واللا كبابيش واللا من وين ..؟ والجبال دى شكلها كيف بالله كبيرة... سلسة ... فرادية ( كدا تخلينى اقص درب رحلتك دى بالقوقل )
هــل لاقتكم غزلان كتيره ... اصطدت منها .. المويه كيف ... فى واحات ؟

عمك بحت التفاصيل ورحلة زى دى ما بنقدر نفوتها ساكيت كدى اشرحا لينا بالعربى كدا .. يعنى سردك الجميل داك وأدى قلمك حريته يبدع لينا فى الخلا داك..

لك مودتى والف تحية

ابوسعود

ام محمود

ام محمود: عدد المساهمات : 237
تاريخ التسجيل : 18/05/2009

مساهمة رقم 4

رد: رحلة في صحراء بيوضة

ام محمود الإثنين يونيو 01, 2009 2:28 am

ود الملاوي كتب:ياجماعة القصيدة ما عجبتكم ما شوية كدا كشكروا وجاملوا انشاء الله

يديك العافيةياود ملاوي القصيدة جميلة جداً
بدون مجاملة وتسلم يديك عليها
وتحياتي

ود الملاوي

ود الملاوي: المشرف العام; عدد المساهمات : 357
تاريخ التسجيل : 09/05/2009
الموقع : الدمام - السعودية

مساهمة رقم 5

رد: رحلة في صحراء بيوضة

ود الملاوي الإثنين يونيو 08, 2009 5:51 am

الغالي ابدا ودوما ابو سعود

اول هام كما يقول اهلنا المصريين انا مولع بالصيد والخلا والكلام دا زمان طبعا وصلت مرحلة اني طلعتا تصديق لمزرعة غزلان في ام ضحيان لكن جات سفينة الغربة وحملت الجمل بما حمل .
الرحلة بدات من كرقس والمفروض ان نطلع من ابو سلم عبر خور ابو سلم مرورا بمنطقة الدعيوب بالابل انا وعمنا حبوب ود حسن من ابو سلم رجل خبير بالخلا ونتزامل دوما في رحلاتنا سواء للصيد او لتوصيل الماء الى غنمنا التي عادة ما ناخذها لخلاء بيوضة في مواسم الخريف وفي ابو سلم استجدت احداث غيرت مسار الرحلة وجدنا اسماعيل دبورة مع فرح العطا وهم يتشاورون في امكانية الترتيب لرحلة للخلا وعند وصولي اليهم ويعلمون سابقا بنيتنا انا وحبوب اقنعونا بالذهاب جميعا ورحلتنا تلك كانت لثلاث اهداف الهدف الاول توصيل ماء للغنم الكانت موجودة بمنطقة التلعة راس وديان تتجه شرقا والهدف الثاني بحثا عن الصيد والثالث اكتشاف للمعالم المذكورة في الرحلة وصلناها لاول مرة لأن رحلتنا تلك اختلفت عن سابقاتها من حيث الدابة المستقلة وكانت شاحنة مرسيدس خفيفة مخصصة للخلاء والطرق الوعرة ملك لاسماعيل دبورة من عطبرة واختلفت ايضا من حيث مجموعة الناس كان معنا فرح العطا والشيخ ابو كوافيت من ابو سلم وانا وحبوب واسماعيل دبورة وطاقم الشاحنة وآخرين وبدل الطلوع بالدعيوب طلعنا من كرقس اول منطقة وصلناها التلعة تقريبا ساعتين بالشاحنة بيتنا مع المجموعة الماسكة الغنم بعد اكرمونا بكبش دعول وذلك نسبة لشحة الصيد فبعد الخريف عادة الغزلان ما بتكون قريبة فالخضرة في كل مكان .
اليوم الثاني توجهنا غربا من التلعة الي منطقة اب سول ومنه وصلنا الرزام الرويان والرزام العطشان وهي جبال كبيرة وكانت اخر مكان نصلو انا وحبوب في رحلاتنا السابقة لاننا كنا نختار زمن الصيد في الصيف والعطش والغزلان بتكون قريبة جدا فمثلا نطلع بالجرار الزراعي ليلة واحدة مسافة نصف ساعة العربة الصغيرة ونصيدلنا تلاتة اربعة ونرجع .
من الرزام ومازالت الرحلة متجهة غربا وصلنا مسيرة ساعة اخرى وصلنا منطقة جبل السميح وهنا رفع عمنا حبوب الراية وقال لازم نصل الاسد وهو من سكان المنطقة وجدناهو في وادي قرب السميح بغنمه واهله واخذناهو معنا دليلا لبقية الرحلة من السميح توجهنا الى ود حبوش ومنه سلسلة جبال الوكريات والدموعيات وبها مناطق فسيحة ورحبة مد البصر وجدنا فيها غزلان بسيطة ولكن لان الشاحنة بطيئة وصوتها عالي مرقت مننا بي قدرة قادر .
من الوكريات توجهنا غربا وفتنا منطقة جورا وصلنا الى منطقة امات حطيب وبها وديان كثيرة وبعدها جبال تفصل صحراء الرباطاب عن الحسانية وقيل لنا بان الابل التي تعبر تلك الجبال رجوعا قاسي ، ومن احد اودية امات حطيب حملنا بعض الجوالات من المحريب وتراهو هناك اخضر ومنور وكان احدا قام بفلاحته وترتيبه فسبحان الله رب العالمين .
من امات حطيب رجعنا شرقا مع بعض الميلان ناحية الجنوب وكانت الوجهة واحة جوراء وهي واحة سبحان الله اجمل ما رات عيني وسط الصحراء محاطة بسلسلة جبال النحلة الدخول لها كان عبر ممر ضيق بعدما اجتزنا الممر الكل في العربة تفاجأ مما رأينا مزرعة نخيل اكتست من الخضرة لونا قلما تجده في مزارعنا واشجارنا التي ترقد محازية لهبة الرحمن النيل والسبب ان هذه الواحة الماء فيها يبعد عن السطح بضعة امتار يسكن بها منصوري يمتلك هذه المزرعة وقهوة ، تمر به اللواري المتجهة من المناصير الي عطبرة صلينا مغرب اليوم الثاني بجوراء وشربنا بها الشاي وتزودنا بالماء ومنها رجعنا لمعقل الاسد بالسميح بيتنا معه وايضا قام باكرامنا بكبش اخر وفي صبيحة اليوم التالت رجعنا عبر نفس الطريق الى التلعة ارتحنا مع غنمنا ومن معها من الرعوية وامددناهم بما جادت به براميلنا من ماء جوراء النقي الصاطع الحلو المذاق وبيتنا لليلتنا الثالثة بعدها عاد ركبنا يحمل من الرحلة اجمل ما رات الاعين من المناظر وكرم اهل الخلا وجوالات مليئة بالحمريب وبنادق لم تجد بغيتها من دغس العيون .
ودي نصيحة ليك ياعمنا ابو سعود اذا لقيت طريقة تزور البلاد دي ما تتاخر
لك مني خالص الود والتحايا

ود الملاوي

ود الملاوي: المشرف العام; عدد المساهمات : 357
تاريخ التسجيل : 09/05/2009
الموقع : الدمام - السعودية

مساهمة رقم 6

رد: رحلة في صحراء بيوضة

ود الملاوي الإثنين يونيو 08, 2009 5:56 am

العزيزة أم محمود تشكرات الاف على المرور والاشادة كتر خيرك انتي وعمنا ابو سعود ما قصرتو رفعتوا لي الروح المعنوية

دوما امنياتي لكم بالصحة والعافية

ابوسعود

ابوسعود: مشرف المنتدى العام; عدد المساهمات : 87
تاريخ التسجيل : 19/05/2009
العمر : 64

مساهمة رقم 7

رد: رحلة في صحراء بيوضة

ابوسعود الثلاثاء يونيو 09, 2009 4:28 am

ابن اخى العزيز ايهاب . كنت متأكد انك ستتحفنا بهذه الروعة وهذه السمفونية الجميلة وما وصفته لوحة رائعة ورحلة فعلا تستحق التسجيل ولن تمحى من الذاكرة .. صحيح سفينة الغربة تحطمت عليها اشرعة آمال كثيرة .. و لكن الخير فيما اختاره الله ونحمد الله على ذلك ..
من اجمل الهوايات اذا تيسرت هى الصيد .. وأذكر كنت ايام الصغر وعندما كان الوالد بكرقس نخرج دوما معه والعم احمد كرز رحمهما الله الى الصيد خارج كرقس ... لكن اذكر انهما ما كانا يبتعدان كثيراً فكانت العملية على اطولها ثلاث الى اربع ساعات فى الصحراء ثم يعودون بخير وفير وكانت الغزلان كثيرة فى ذلك الزمان ..
فكرة غنم بالصحراء رائعة جداً ... واعتقد ان الظروف الان تغيرت كثيراً ولا يتوفر ذلك ..
لم اكن ابدا اتصور او يخطر على بالى ان الصحراء المتاخمة لمناطقنا بهذا الجمال والروعة
و المغامرة فيها امر رائع وممتع .. اماكن كثيرة لم اسمع بها .. ما اجمل ان يكون الانسان مستطلعاً على الاقل ان يتعرف على ما حوله .. لكن كما ذكرت طريقنا حدد لنا ومشيناها خطا كتبت لنا والحمد لله ..

لفت انتباهى من الشخصيات التى ذكرتها اسماعيل دبورة .. والان فقط عرفت سر تلك الاخوة والعلاقة بين والدى والمعزة المتبادلة بينه وبين آل دبورة اصحاب المكتبة فى عطبرة ..
كما انك ذكرت الشيخ ابوكوافيت من ابسلم .. هل له علاقة بالرجل الصالح امحمد ودعلى ابوكوافيت على ما اذكر) الذى عاش معنا بمقرات فى حلة زروق وتوفى فيها ؟ ... بنته اسمها ام الشيخ .. وبالمناسبة لنا اقرباء فى ابسلم وهم اهل محى الدين عبدالغفار ان كنت تعرفه كان معنا بجدة ..
تصوير مبدع وسرد رائع .. امتعتنا يا ايهاب ..اشكرك
لك خالص تقديرى
ابوسعود

ود الملاوي

ود الملاوي: المشرف العام; عدد المساهمات : 357
تاريخ التسجيل : 09/05/2009
الموقع : الدمام - السعودية

مساهمة رقم 8

رد: رحلة في صحراء بيوضة

ود الملاوي الأربعاء يونيو 10, 2009 12:54 am

عمنا العزيز ابو سعود

فعلا كانت رحلة طبعت بنقش من ذهب على جدار الذاكرة واروع ما فيها ذلك التعب الجميل كنا نفترش الارض ليلا في الوديان مستعينين بحفرة في الرمال خلف تلة او شجيرة لنقي انفسنا شدة البرد وويلاته وعادة ما يكون قاسي ليلا فقد كانت رحلتنا مع بدايات الشتاء .
ابو كوافيت هو فتح الرحمن ابو كوافيت وهو امام مسجد ام مريخ في ذاك الزمان و شقيق محمد عثمان ابو كوافيت امام مسجد ابو حمد اسرة ما شاء الله عليهم اشتهروا بالتقوى والورع وبالتاكيد هو قريب محمد على ابو كوافيت الذي ذكرته .
اما ال محي الدين عبد الغفار فغنيون عن التعريف وهم بجزيرة قلقتي وشقيقه عباس كان زميلي وصديقي بثانوية ابو حمد عبرك وعبر هذا البوست خالص التحايا لهم ولجميع اهلنا من الشامخية الى السنقير .
دمت بالف خير

مصطفى المأمون

مصطفى المأمون: عدد المساهمات : 1
تاريخ التسجيل : 04/01/2010

مساهمة رقم 9

رد: رحلة في صحراء بيوضة

مصطفى المأمون الأربعاء يناير 06, 2010 4:06 am

لعله من حسن الطالع أن تكون فاتحة دخولي إلى هذه المنتدى من هذه الزاوية
استمتعت و استغربت
استمتعت بالقصيدة و استغربت من كل تلك التجارب الثرة من قبل ذلك الشاب
كما استمعت بحوارك مع أخونا أبو سعود .. له و لك التحية

ود الملاوي

ود الملاوي: المشرف العام; عدد المساهمات : 357
تاريخ التسجيل : 09/05/2009
الموقع : الدمام - السعودية

مساهمة رقم 10

رد: رحلة في صحراء بيوضة

ود الملاوي الأربعاء يناير 06, 2010 4:22 am

عمنا مصطفى المامون
متعك الله بالصحة والعافية وانه لمن عظيم الشرف والسرور ان تزورنا عبر صحراء بيوضة
مرورك وشهادتك وسام على الصدور
لك من خالص الود والتقدير

الرشيد عبد المعروف صديق

الرشيد عبد المعروف صديق: مشرف المنتدى الإسلامي; عدد المساهمات : 219
تاريخ التسجيل : 20/05/2009
العمر : 74

مساهمة رقم 11

الشاعر والروائي ود الملاوي

الرشيد عبد المعروف صديق الخميس يناير 14, 2010 12:55 am

الشاعر والروائي ود الملاوي: لك مني أجمل تحية، لقد استمتعت مثلما استمع أخوي من قبل أبو سعود ومصطفى المامون، حقاً لقد أتحفتنا بمناظر جميلة عشناها معك كأنها رأي العين، أسأل الله أن يمتعك والسامعين والقارئين بموفور الصحة والغفران، لك ودي.

ود الملاوي

ود الملاوي: المشرف العام; عدد المساهمات : 357
تاريخ التسجيل : 09/05/2009
الموقع : الدمام - السعودية

مساهمة رقم 12

رد: رحلة في صحراء بيوضة

ود الملاوي الأحد نوفمبر 21, 2010 12:26 am

عمنا الرشيد متعك الله بموفور الصحة والعافية
مرورك وسام شرف لنا ولصحراء بيوضة
وكل عام وانت بالف الف خير

رباطاب اون لاين

رحلة في صحراء بيوضة