5 مشترك

الكلام ليك يا ود طه

فارس: عدد المساهمات : 4
تاريخ التسجيل : 01/07/2009

مساهمة رقم 1

الكلام ليك يا ود طه

فارس الإثنين يوليو 06, 2009 9:40 am

ألف تحية ومليون سلام للجميع ... ومعليش مع إني جيت متأخر بس حأركب قدام ... ما هو البيت بيتنا وما دايرين لينا عيزومة ... ولا شنو يا ود الملاوي ...
عندي موضوع طرحته كم مرة في المنتديات ... وهو بالجد حارقني حرقة شديدة ... وهو أننا أصبحنا أداة ضحك فقط ... ينط محمد موسى في الشروق يقول ليك في واحد رباطابي ووووو .... أي فرقة كوميدية دايرة تظهر تدخل الرباطاب ..... مابطال نقول شهرة لجزء من الموروث الثقافي ... بس نحن موروثنا هو المساخة والرد السريع فقط .... لا تاريخ لا فن لاكورة يا ود طه ... حتى تاريخ السودان غفل أو تجاهل تاريخنا ... وأتى كعناوين فقط أو عدة سطور ...
أخش في الموضوع يا ود طه ... قناة الشروق ... الما حصل محمد موسى عمل ليه حلقة الا دخلنا فيها بي نكتة ... أنا داير بدل ندخل فيها بالنكات وبي ناس آخرين ندخل برانا ونطرح زاتنا في حلقة متكاملة عن الرباطاب الحاضر والمستقبل ... نتحدث عن أرض إنتاج الكهرباء في السودان ... والتاريخ والفن وغيرها ... الشغلانة يا ودطه بالبلدي دايرة ليها شوية حركة وتنسيق ... وعندك ما شاء كل الكوادر داخل الخرطوم وخارجها ... ناس إبراهيم دقش وناس معتصم عبد الرحيم وناس رضا مصطفى وناس اليسع وعلييييييييك بالكوم ...
فيا ود طه ( الكاج ) شكلو عندك ولو ما تميت الموضوع ده ما حيمشي لي زول تاني فشد حيلك معانا ...
لكم خالص الود

الياس كرقس

الياس كرقس: مشرف المنتدى الرياضي; عدد المساهمات : 47
تاريخ التسجيل : 06/05/2009
العمر : 56
الموقع : مشرف

مساهمة رقم 2

رد: الكلام ليك يا ود طه

الياس كرقس الإثنين يوليو 06, 2009 1:36 pm

عمنا فارس حبابك الف والبيت بيتك زى ما قلت وماك داير العيزومه ود طه دا نعل مو انا عموما كان ما انا اعتبر نفسى انا المهم كلامك فى محلو يجى ودموسى يالف فوقنا وحتى ودالزومه يقول كلامو ويرمى فى الرباطاب واصبحنا على المستوى الاعلامى معروفين باننا مسيخين وناس نكته واهم مايميزنا لم يعرفه عننا الناس وهو الجديه والحزم والذكاء ولكن هذا دور ابنائنا الذين يعملون فى المجال الاعلامى وهم كثر وسوف نجتهد لكى نوصل لهم وياخدو دفره فى هذه الحلقه التى ذكرتها وهناك حلقات توثيقيه عملها اليسع حليب عن الرباطاب فى التلفزيون القومى عن طريق برنامج دنيا الذى يبث كل جمعه والذى اعده اخونا خالد البلوله وقد كان ناجحا بالرغم من انه لم يشير لكل الجوانب الرباطابيه خاصة العادات الاجتماعيه كالزواج والحفلات والمشاهير فكل تركيزه كان عن الجانب الحرفى ومهارات الرباطاب فى اكل عيشهم لك الود اخونا فارس

ود الملاوي

ود الملاوي: المشرف العام; عدد المساهمات : 357
تاريخ التسجيل : 09/05/2009
الموقع : الدمام - السعودية

مساهمة رقم 3

رد: الكلام ليك يا ود طه

ود الملاوي الثلاثاء يوليو 07, 2009 12:27 am

الغاليان فارس والياس الفين سلام ومليون تحية

والله الطرح الطرحتو جميل وبناء وحتى قدر التوثيق البسيط الذكرو الياس في التلفزيون القومي الذي اقتصر على بعض المناطق بعينها اثلج صدورنا وكنا ننتظر برنامج دنيا بفارق الصبر لكن لابد من الاجتهاد ليكون التوثيق لكل الرباطاب يبرز كل معالمنا وتاريخنا وفننا ياريت ، وتكلمت ايضا مع عمنا ابوسعود في نفس الموضوع واشاد بالطرح وهو اكيد حا يتحفكم ببعض النصايح .
دمتم والعافية ليكم توب

فارس

فارس: عدد المساهمات : 4
تاريخ التسجيل : 01/07/2009

مساهمة رقم 4

رد: الكلام ليك يا ود طه

فارس الثلاثاء يوليو 07, 2009 1:25 am

تحية للجميع والكلام ليك يا الياس ..... دحين ابقى عشرة وذي ما قلت ليك الشغلانة دي حارقاني حرقة جد ... خاصة محمد موسى ... شان كده شيل عصاتك وامش شوف لينا قناة الشروق دي محلها وين في الخرطوم .... وقول ليهم بدل ببتعاملوا بالمرقة نحن جاينكم بي ضبيحتنا عديل ....
الموضوع يا الياس محتاج لشوية ترتيب وشوية جهد وانت أهل لذلك ... بس نتمنى أن تكون حلقة تسبق الوراها والقدامة ...
والناس معاك والأخ اليسع حليب سمعت انو معاك طوالي شاني كده شد حيلك ... والكاج عندك يا ضكر

ابوسعود

ابوسعود: مشرف المنتدى العام; عدد المساهمات : 87
تاريخ التسجيل : 19/05/2009
العمر : 64

مساهمة رقم 5

هل من وقفة ؟

ابوسعود الثلاثاء يوليو 07, 2009 3:40 am

الأعزاء الاحبة الكرام ... فارس اول من رمى بحجر فى البركة الراكضة ... الياس الذى تحزم وقال انا لها .. وودالملاوى الذى اخذ همها وعزم حتى النصر .. لله دركم .. لكم التحية والتجلة والاحترام جميعاً .. وها أنتم كما نريدكم ان تكونوا... طوبى لكم..
ما ذكره فارس حقيقة عانينا منها كثيراً وطويلاً .. فالمدعو محمد موسى هذا كارثة حقيقية يجب تخطيها . وتاريخنا وتراثنا وارثنا قد تم وأده واغفاله بجهالة وتراخى وتقصير كبير .. دائما كنت اقول أن منطقتنا نالت حظها من العلم والمعرفة فى وقت مبكر وكان اهلها رواد تعليم وتثقيف .. وكنت قد اوضحت ذلك فى مقالى (هنا امدرمان لوتذكرونه) وسأعيده منقحاً مرة اخرى بهذا المنتدى ان شاء الله .. فالمتعلمون كثر والمتنفذين فى الدولة فى جميع الحكومات وفى كل المجالات كثر كذلك .. اى لا ينقصنا شىء فالمؤرخون العارفون بالمنطقة موجودون والاعلاميون والصحفيون موجودون ... ما ينقص هو العزيمة وقوة الاراده والتصميم .... وبلا إطالة... اعتقد ان الخطوات المطلوبة لعمل حلقة توثيقية عن الرباطاب فى قناة الشروق بعيداً عن ترهات محمد موسى كألاتى:
- طرح الموضوع على نطاق واسع كتجمع وروابط الرباطاب بالعاصمة وتكوين لجنة بتجهيز المادة العلمية والتاريخية والفنية والاجتماعية .. الخ ولكن بشرط ان تكون جدية وقصيرة الامد ليس كتلك اللجان التى تنبثق منها لجنة وتتفرع منها لجنة وتولد منها لجنة (وحجوة الضبيينة) المطلوب لجنة مصغرة جادة قوية تعى المطلوب .. بعد الرجوع للمصادر التوثيقية كالدكتور عبدالله احمد عبدالله ودالامين الرفاعى وبقية اساتذة الجامعات الكثيرن خاصة جامعة النيلين التى تعج باستاتذة الرباطاب .. يتم الاتصال بهم واخذ ما عندهم وتجمع المادة ولا ننسى الاتصال بأهل البلد كبار السن والعارفين فى هذا المجال من غير الاكادميين بطبيعة الحال ..
- ضرورى جداً الاتصال بالدكتور عبدالله على ابراهيم الذى سبق ان كتب عن الرباطاب وكذلك د/ السفير احمد المعتصم الذى قدم دراسات بحثية عن التراث فى منطقة الرباطاب خاصة خلال فترة حكم العنج بالمنطقة ..
- يطبق هذا فى مجال التاريخ والتراث والفن .... الخ
- يمكن للاخ محمد محمد احمد كرار المساعدة الفاعلة فى هذا المجال وهو موثق وصحفى صاحب جريدة الشارع السياسى ..
- بعد جمع المادة وتحديد المطلوب وتحديد المناطق المطلوب زيارتها والتوثيق عندها يدفع بالموضوع بادارة قناة الشروق بمساعدة الصحفيين والاعلاميين الشباب من ابناء الرباطاب .. واعتقد ان الاخ كباشى العوض المخرج بالتلفزيون القومى يمكن ان يساعد فى هذا المجال وهو مخرج ممتاز من ابناء الباوقة ..
والخلاصة ان المطلوب هو تسليط الضوء على تاريخ المنطقة التعريف بتاثيرها على السودان ككل و مساهمتها فى بناء الانسان السودانى عامة فالرباطاب ليسو فقط اؤلئك الناس (سريعى الرد المسيخ) ابداً هناك بطولات وسفراء علم ومعرفة وتصوف وفنيون وعمال بنو السكة الحديد ( الدريسة) وشاركو فى صد هجمات الاتراك والانجليز وناصروا المهدى واسسو التعليم بامدرمان وعملوا بالتجارة شرقا وغربا وشمالاً .. ووووو وفنهم لا ينحصر فى احمد عمر الرباطابى فقط وفى بشير الرباطابى اول سجل اسطوانة حقيبة بمصر .. لو سألت اى رباطابى (ربما لم يسمع ببشير الرباطابى اصلاً) وفى افضل الاحوال يقولون لك ان اول من سجل اسطوانة بمصر هو بشير الرباطابى .. من هو بشير الرباطابى ؟ من اى قرية بالرباطاب ؟ ماذا غنى .؟ اين اهله من عاصره ..؟ متى ولد ومتى توفى اين تراثه ؟ لا احد يعرف ...للاسف لا احد يعرف ...
سبق ان كررت فى مناسبات عدة اننا مقصرين تجاه بلدنا وقارنت بيننا وآخرين وجدت رصيدنا فى التفاعل والتعاون صفر.. فهل انا محق ؟ وهل من وقفة فى موضوع التوثيق للرباطاب فى قناة الشروق مجابهة لما يروجه محمد موسى ..؟؟؟
دمتم سالمين
ابوسعود
ابوالقاسم هاشم عبدالله

الرشيد عبد المعروف صديق

الرشيد عبد المعروف صديق: مشرف المنتدى الإسلامي; عدد المساهمات : 219
تاريخ التسجيل : 20/05/2009
العمر : 74

مساهمة رقم 6

رد: الكلام ليك يا ود طه

الرشيد عبد المعروف صديق الثلاثاء يوليو 07, 2009 11:20 pm

<H3 dir=rtl style="MARGIN: 12pt 0cm 3pt; DIRECTION: rtl; unicode-bidi: embed; TEXT-ALIGN: right">

الإخوة المتداخلون في موضوع الرباطاب والتعليق عليهم من قبل الأخ محمد موسى ونكاته وبرنامجه في قناة الشروق، أولاً جزاكم الله خيراً على غيرتكم على المنطقة وسكانها ودا طبعاً شيء ما مشحودين عليهو، لأنه الزول أكان ما دافع عن نفسه منو البيدافع عنه، لكن كما يقولون "اختلاف وجهات النظر لا تفسد للود قضية" في ظني أن محمد موسى ساهم مساهمة كبيرة في التعريف بالرباطاب ونشر ما عندهم من ذكاء وسرعة بديهة، وقد يعتبر البعض ما يحكيه محمد موسى عننا بأننا مسيخين ودا المخلي كثير مننا زعلانين من محمد موسى، لكن يا إخواني تصدقوا اليوم أي سوداني من مناطق الجزيرة والغرب والمناطق البعيدة عن منطقة الرباطاب إذا سألك عن قبيلتك أول ما تقول ليهو رباطابي يضحك وتشعر بأنه يضع لك ألف حساب خوفاً من سرعة الرد ويضع في ذهنه أنك إنسان عبقري وسريع البديهة، طبعاً في ناس حيقولوا يعني نحن قبل محمد موسى ما كنا معروفين، كنا معروفين عند البعض تحت راية الجعليين، وأنا مرت بي كثيراً كلما سألني واحد قبيلتك شنو؟ أقول ليه رباطابي يقول لي يعني جعلي، أعتقد جاء اليوم الذي أصبحنا نعرف بأننا قبيلة لها تميزها عن باقي القبائل، وأصبح الواحد منا إذا عملوا معه لقاء في التلفزيون يفتخر ويرفع راسه ويقول أنا رباطابي، هذه النقطة التي أردت أن اشارك فيها، لكم ودي.

</STRONG></H3>

ود الملاوي

ود الملاوي: المشرف العام; عدد المساهمات : 357
تاريخ التسجيل : 09/05/2009
الموقع : الدمام - السعودية

مساهمة رقم 7

رد: الكلام ليك يا ود طه

ود الملاوي الأربعاء يوليو 08, 2009 12:19 am

العم الغالي الرشيد عبد المعروف

مليون سلام والفين تحية اولا لا نخالفك الرأي فيما ذكرت لكن الا ترى معي ومع البقية بأن لنا ارث ثقافي ومكانة مرموقة وإسهاما في التاريخ السوداني طي النسيان كلما ذكرت قبيلة من القبائل ذكرت امجادها ودفاعها عن السودان في معركة كذا وكذا ونحن كانه لم يكن لنا اجداد ضحوا بمهجهم رخيصة لاجل السودان ورفعة السودان ، واليك المثال على كلامي في عام 1991 م وانا طالب بالمرحلة الثانوية بابي حمد وفي عطلة من عطلات نهاية الاسبوع طلعنا ومعي اثنان من ابناء العمومة الى منطقة جبال نمرة عشرة سيرا على الاقدام بغرض النزهة واكتشاف المنطقة وتفاجأنا بوجود مقبرة كبيرة جدا جدا بالقرب من سلسلة جبال نمرة عشرة وبعد السؤال عنها من كبار السن والعارفين بتاريخ المنطقة اكتشفنا بانها مقبرة لنفر من اجدادنا ماتوا في معركة من معارك السودان في صد المستعمر والتي لم ترد لا من قريب ولا من بعيد في كتب التاريخ المعاصرة الا ان جاز التعبير ممكن ان تكون قد وردت في كتب لم اطلع عليها وقد كانت معركة كبيرة شبية بمعارك مهيرة والنخيلة فهل فيكم من سمع عنها ناهيك عمي الرشيد عن بقية القبائل التي عرفنا عليها ود موسى واصبح من يسمع اننا رباطاب يضحك ويخاف فقط وكاننا ما خلقنا ولا عشنا الا بهذا ولهذا . دا مثال لجزء من كتير عن الرباطاب يجب ان يزاح عنه الغبار ويوضع في مكانه المناسب .
دمت والجميع بالف خير

ابوسعود

ابوسعود: مشرف المنتدى العام; عدد المساهمات : 87
تاريخ التسجيل : 19/05/2009
العمر : 64

مساهمة رقم 8

رد: الكلام ليك يا ود طه

ابوسعود الخميس يوليو 09, 2009 5:51 am

التحية لكم جميعاً اعزتى ..
اخى الرشيد / اوافقك الراى ان الرباطاب أشتهروا بسرعة البديهة والرد السريع (اعتبره البعض مساخة) والذكاء وروح الدعابة والظرف واول ما كتبه المستشرق نعوم شقير فى كتابه تاريخ وجغرافية السودان فى وصف الرباطاب ... كتب انهم ( قوم يتميزون بالذكاءوسرعة البديهة ..) وبحكم التمازج وحركة ابناء القبيلة داخل السودان عرفتهم كل القبائل الاخرى بهذه الصفات واشتهروا بها منذ امد بعيد .. لكين اعتقد ان اخونا محمد موسى(مسخها شوية وطجاها موية ) وربما انه امتهن هذه المهنة وكان لابد له من ان يرتكز او يؤلف نكاته على ادروب والرباطابى وابكر وتخصص آخرون فى النكات على الدينكاوى الجنوبى وبعضهم فى ناس العوض .. وهكذا ) والاعزاء الذين يزعجهم محمد موسى وانا منهم .. يرون انه يفعل ذلك بحكم مهنته ولكسبه فقط ..والحقيقة ان للرباطاب ارث وتاريخ قد يندثر فى صفحات يطويها النسيان يجب البحث عنها وتعريف الاجيال بها ... ليس عنصرية ولاعصبية....ولكن تعريفاً لدورهم كرافد من روافد الثقافة هذا فى البلد ...

يحكى ان كان رباطابياً كان مسافراً بالقطار من بورتسودان للخرطوم ولم يجد مقعداً بالدرجة الرابعة لشدة الزحام .. واراد ان يستميل الجالس قربه بالونسة فيحظى اخيراً بطرف على المقعد فسأل الرجل الجالس .. من اين انت ؟
اجاب الرجل ... انا من الخرطوم
فسأله الهندوى ... الاسل ( يقصدالاصل ) من وين ؟
اجاب الرجل ... الاصل رباطابى
خاف الهندوى وقال ( اعوذ بالله هسع تقوم تسحرنى)
نظر اليه الرباطابى سريعاً ( هندودى .. طويل القامة .. شعر كثيف وغزير .. متوشحا ثوباً معكوساً على كتفيه .. وسروال فضفاض ) ورد عليه :
( يسحرولك شـنو عامل كدا زى الفانوس ابـقزاتن مكسورة )...

دمت جميعاً بخير

ابوسعود

رباطاب اون لاين

الكلام ليك يا ود طه